يُمَه ذبحني بغلاه ... وطبعه الهادي
هو صاحب الفضل في هالعشق ... والمنهـ


مدري انا البادية ... والا هو البادي
بس المهم الهوى فينا غرز سِنهـ



والله يا حضنه حضن ... وشفاهه تنادي
وجوارحي كلهن يُمَه يلَبِنهـ



يُمَه وربي انا مالوم حسادي
ادري بهن حاولن بالكيد يغونهـ


وهو يتحمل غثاي ... ويعشق عنادي
يموت بي موت وغيري ما درى عنهـ


يُمَه تماديت به والقلب متمادي
ومشاعري ضيعن قلبي ... وذلنهـ


من قبل اعرفه وقلبي بالهوى غادي
وعقبه عرفت النعيم وريحة الجنهـ


انفاس صدره اذا فاحت زهر كادي
اقرُب من شفاهه الحلوات وآكنهـ


ادري الهوى شين ... لكن ربي الهادي
يمكن يجي يوم وانسى ... بس ما اضنهـ


شابت عيونه على فرقاي وبعادي
وذابت حوايف خصر سلمى من الحنهـ


اقول خذني " من الوادي ... الى الوادي "
ويقول بس اركدي واجيك بالسنهـ


وركدت يُمَه ... ولكن طَوّل ركادي
متى البشاير يجن قلبي يهزنهـ ...؟!


اقلق مزاجي هواه ... وعكر رقادي
وعروق قلبي من النشوة يحزنهـ


افز من عز نومي بحلمي انادي
اوِن بإسمه ... وترجع لإذني الونهـ


اللي عشق غير خلي ... بالهوى غادي
واللي عشق غير خصري ... بايخٍ فنهـ


يُمَه يقولون عشق البنت "مو عادي"
والا الولد لو عشق يمكن يجي منهـ ...